رباط السالفة عليكم 8 - نقيب هارون

[Paules]

  اكو نائب عريف  من الناصرية اسمه  هارون ....  و هارون شاب  حلو و طولة هيبة
هارون من  ينزل  مجاز  يشد رتبة مال نقيب و يروح  لاهلة ... و بالحرب كان الضابط يگعد بالكشن اللي ورة السايق  مال منشاة  ....
و فد  يوم ( النقيب هارون ) ناسي  نفسة و لابس البيرية مثل مايلبسوها  سواق  ( الايفا) بالجيش
بالسيطرة  صعد الانضباط يفتش - فشاف النقيب (هارون ) لابس البيرية بالهالشكل  و گلة ( الانضباط) سيدي  مايصير  انت  نقيب و تلبس البيرية مثل ما يلبسوها الجنود
هارون انتبه  و عدل البيرية  و انتبه  انه الناس گامت تضحك عليه  لانه الانضباط  رزلة  -  گام هارون  يغلط  على الانضباط  و دفعه ...
الانضباط سحب اجازة و السنوية  مال  سائق المنشاة  و نزل  و صاح الضابط  ابو السيطرة  ...
الضابط  اجه صعد للمنشاة  و طلب من نقيب هارون  ينزل من السيارة
نزل  هارون و صياح و غلط صار بيناتهم  و بهذه الاثناء طبگت  سيارة  سوبر و نزل منها  عميد  ركن  و سأل  شنو الموضوع ؟
فنقيب  هارون  گالو  سيدي هذولة  مايحترمون  و  شرحلة القصة .... العميد الركن  رزلهم  و غلط عليهم   و طلب من نقيب هارون  يجيب  جنتطة و يجي يصعد  بسيارته السوبر
هارون  من  صعد  بسيارة العميد الركن  كالة  سيدي  ا‏گلك  شئ  بس  تنطيني  الامان  ؟
العميد  گلو  گول  و الك  الامان
هارون  گلة  : ترة انا  نائب عريف  مو  نقيب  .....  ضحك  العميد  و گالة  وين المشكلة  ؟ يعني  اني  هم  نائب ضابط و شاد عميد ركن !!!!
-
-
- 
رباط سالفتنة  وين ... ؟

منا  و هيج  راح  تقرون اللافتات  كلها  دكتور فلان  و مهندس  فلان و هي كلها دگ النجف  صادرة من سوق مريدي  .....  مع  احترامي  للشهادات الاصلية 
وبعد 4  سنوات  تطلع  كلها  .......  !!!


تحياتي