ليش العراقي بره يتصرف غير شكل

[ماهر سعيد متي]

ليش العراقي بره يتصرف غير شكل !!!

د.محمد ادريس محمد
ليش العراقي من يطلع بره يقبل يشتغل اي شي  ومن يجي بالعراق ميقبل الا وزير !

ليش العراقي من يسوق بره ما يمد ايده على الهورن وجوه بالعراق ما يشيل ايده من الهورن !

ليش العراقي بالخارج يشرب عرك ومن يجي للعراق يلبس عمامة !

وليش العراق بالخارج يوكف بالسره لدائرة الهجرة عشر ساعات وبالعراق ميقبل يوكف بالسرة !

وليش العراقي بالعراق عنتر ويشيل اربع مسدسات وبالخارج  ميكدر يعبر الشارع الا صديقه يلزم ايده ويحضنه!

وليش العراقي باوروبا يربي (جلب وبزونه )وبالعراق بس يشوف ( جلب ) بالحجار وراءه

وليش العراقي بالعراق بعد خروجه من الجامع يكسر كلوب الشارع وباوروبا يمسح الشارع بايديه

وليش العراقي باوروبا يحجي على كيفه يدوب تسمع حسه وبالعراق بس يعيط

وليش العراقي بالعراق يشمر كشور وقواطي بالشارع وباوروبا حتى كطف الجكارة يحطه بجيبه

وليش العراقي بالعراق يصلي سبع اوقات وباوروبا يصلي بالسنة مرة

وليش العراقي باوروبا يلبس تراجي وبالعراق يسوي نفسه فحل التوث

وليش العراقي باوروبا يكيف من بنته تجيب البوي فريند للبيت وبالعراق ميخلي بنته تصعد بالسطح

وليش العراقية باوربا تشرب جيكارة بالشارع وبالعراق تشرب جيكارة بالتواليت

وليش العراقية تقبل تتزوج اي واحد باوروبا وبالعراق متقبل الا دختور

وليش العراقية بالعراق تمشي مدنكره راسها وباوروبا تخنزر على الكل

وليش العراقية باوروبا تشرب الواين وتكول هذا عصير عنب وبالعراق تستحرم تاكل عنب


وليش بالعراق العراقية شعرها كل شيب وباوروبا تصبغ شعرها احمر

وليش العراقية بالعراق محجبة وبسوريا تركص بالملهى !
اما عالبس التنورة الميني والميكري جوب الافضل نسد حلكنا ونسكت
يا عيني عالتنوره

وليش اني اخاف اكتب بالعراق ومن اطلع بره لساني يصير طويل ليش

وليش وليش ماادري ليش

Email: admin@sotalhaq.com
http://www.karemlash.net/forum/viewtopic.php?f=9&t=17796

[Paules]

مع احترامي لكاتب الموضوع  و ناشره  فالكثير مما ورد فيه  غير صحيح    وهنالك بعض النقاط صحيحة وان  كان صحيحا فالاندماج مع المجتمع الذي تعيش  فيه و تطبيق القوانين  ليس عيبا.