منتديات برطلي العامة... => قصص وحكايات. => الموضوع حرر بواسطة: برطلي دوت نت في أغسطس 24, 2016, 12:30:08 مسائاً
العنوان: قصة مصلاوية قصيرة
أرسل بواسطة: برطلي دوت نت في أغسطس 24, 2016, 12:30:08 مسائاً
قصة مصلاوية قصيرة
(http://www.baretly.org/)
كان ياما كان على الله التكلان كل من علينو ذنب يقول التوبة واستغفر الله كان اكو فغد غجال عندو ديك مزعج ، اربعة وعشين ساعة يصيح يطفر الما يطفر الجيران خطيي كن بزعو من هذا الديك بس يستحون يقللولو لصاحبو علينو لأن هو هم خوش غجال . فغد يوم ويحد من جيرانو طقت غوحو ، ريجع من الشغل تعبان , وكن تكاون مع المدير وطيلعة الدني من عينو وبس يغيد دينام هذا الديك يصيح عيعي ، عيعييييييييي عيعي , عيعيييييييييييي قام غاح على جارو صاحب الديك وقلو ول اخويي الخاطغ الله والله هذا الديك مالك نبش ابو ابويي , والله كن طفرنا بصياحاتو دعملو جارة يحفظك الله . جارو صاحب الديك هم ما كذب خبغ ، قللو يمعود ابو فلان لحد على بختك والله غدا غدويتك عندي ، دذبحو لهذا الديك والا تاكلو انت بنفسك ، بس هاي الغدتا غالي والطلب رخيص . والله ثاني يوم غاح هذا الجار عد جارو وغشعو كن ذبحو للديك وعملو اشون بداعة بالفغن يشهي العليل ، اكل اكل اكل لمن انترست بطنو وثقلت وشغب جاي وغاح عالبيت ديخ بعد ما شكر صاحب الديك ، رجع ديخ عالبيت دينام العصغ بس حط غاسو عالمخدي واشتغلت رحمة الله عييييييعيييييييييييي عييييييييعييييي عييييييييعييييييييي عييييييييعيييييييي هذا زي قام مثل المجنون ديغشع اشني الصحبي ، طلع بغا اغشع الستاغة مالو عليها سبعين ديك وكلم عيصيحون عييييييييييييعييييييييييي عيييييييعيييييييي غاح على جارو قللو ول دادا الخاطغ الله خلصتنا من ديك اغشع طلع بدالو سبعين ديك ؟ جارو قللو والله يا اخويي هذاك الديك اللي اكلتو كان شيعل ابو ابوهم لهذولي السبعين ديك ما مخليهم يطلعون نفس من ذبحتونو ، طلع حسم لهذولي السبعين ديك . وكنا عدكم وجينا ولو بيتنا قغيب كان جبتولكم حفني قسب وحفني زبيب وهاي القصة كلمن هوا يفتهم .