(https://e.top4top.net/p_705b0pu11.jpg) (https://up.top4top.net/)
اكو واحد عنده طلي راد يبيعه بالولايه ..
ركب على المطي ماله أجلكم الله ،
وربط برگبة الطلي جرس حتى يدگ ويسمعه من يمشي بلا ما يلتفت ..
وربط حبل برگبة الطلي وشده بذيل المطي ..
اكو حرامية تابعوه ..
صاحبنه يمشي براحته فواحد من الحرامية حل الجرس وربطه بذيل المطي وگص الحبل واخذ الطلي وشرد ..
المطي ابو صابر ما صدگ بصوت الجرس گام يفر بذيله وهو متونس عالرنه !
مشى صاحبنه مسافه ولاگاه واحد من الحرامية گاله :
عمي أكو واحد يحط جرس بذيل المطي ؟
گاله عمّي حاطه برگبة الطلي ..
ضحك الحرامي وگاله وين أكو طلي عمي .. صدگ تحچي ؟
دار وجهه واذا الطلي ماكو
گال وروح ابوي انبگت ..
گاله الحرامي شفت واحد ماخذ طلي أوصافه كيت وكيت طب ابذيچ البرديه ..
دخلّي المطي يمي وروح دوّر ..
دور وأيّس ورجع لگه الحرامي فالت بالمطي ..
كال أمري لله راح مشي للولاية ..
عطش وشاف بير بالدرب يمه جماعة ..
أجه يشرب ..
گالوله عمي أكو واحد يدگهه مشي على رجليه بهاي الهيمه ؟!
سولفلهم سالفته ..
گالوله حجي تعرف تسبح ؟
گالهم اي أعرف ، گالوله خوش ..
طاحت من عدنه صرّة بيها ذهب بالبير ..
طلعهه ونطيك فلوس الطلي والمطي ..
أخونه هم نزع هدومه ونزل بالبير ..
وره شوية طلع ، ما لگه هدومه !
ثاري الجماعه نفس الحرامية
أخذوا هديماته وفلتوا !!
( شتگولون هذا هم راح يثق بيهم بعد وينتخب نفس الوجوه للمره الرابعه لو صارتله عبره )