اكاذيب شلش العراقي

[Paules]

كاذيب شلش العراقي ..بقلم : شلش العراقي

23 كانون الثاني (يناير) 2012 , بقلم شلش العراقي

ومصدكين مام جلال يعمل لمصلحة العراق من كسرة وعطش لبوب الشام.

ومصدكَين بصالح المطلك صار نائب لرئيس الوزراء من اجل مستقبل العراق .

ومصدكَين بهادي العامري راح يسوي مطارات العراق افضل من مطارات ماليزيا , لانه خبير مطارات وقطارات وانفاق



شلون واحد يكدر يألف كذبة نيسان بالعراق , صار لي كم يوم محتار , منين اجيب كذبة قوية ,,, منين يا ربي , المشكلة احنا شعب ما متعودين على الكذب , لان حرام , واحنا شعب يصدك المسلسلات التركية والمكسيكية , ويعتقد نهاية الافلام الهندية نهاية طبيعية وتنزل دموعنا عليها , والله خطية اميتاب عمت عيني عليه , للموت وماعاف حبيبته,

شعب نصدك بكل شي , اذا واحد كَال اني سيد نبوس ايده ونحطها على راسنا , واذا واحد كَال اني رجل دين نشيل قندرته ونحطها كدامه , واذا واحد كًال احنا اكثر بلد بالمنطقة استقرارا من الناحية الامنية , نكَله عاشت ايدك , والله متكَول الا الصدك , واذا واحد كَال اني بحياتي ما جنت بعثي , راسا نكَله صحيح , والله انت بحياتك ما لبست زيتوني , واذا واحد كَال رايح لإيران بس اكمل دراستي وارجع ندعيله بالنجاح والتوفيق ونحط صورته على الكوسترات والكيات وبراس الشارع ,

و حتى قاسم عطا (حشاكم) , شيكول احنا نصدك ,

ومرة رئيس الوزراء كَال اسمي جواد المالكي كَلناله طبعا , شنو قابل منعرفك ابو كاظم , وبعدين كَال لا يابه طلع اسمي نوري المالكي , كَلناله هاي شنو ابو اسراء اكو واحد ميعرف انت نوري المالكي .

احنا مصدكَين بالدستور ومصدكَين بالعملية السياسية وبالمصالحة الوطنية وبالشراكة الوطنية وحتى كالونا انتو طلعتوا مو شعب , انتو مجرد مكونات واطياف واحنة مصدكَين ,

ومصدكَين راح نصير احسن دولة بالعالم , ومصدكَين ان رفع الزبالة من محلة الشيخ عمر يكلف صابر العيساوي 43 مليار دينار شهريا , ومصدكَين انه واحد اسمه كامل الزيدي هو افضل شخصية لرئاسة مجلس محافظة بغداد ,

ومصدكين مام جلال يعمل لمصلحة العراق من كسرة وعطش لبوب الشام.

ومصدكَين بصالح المطلك صار نائب لرئيس الوزراء من اجل مستقبل العراق .

ومصدكَين بهادي العامري راح يسوي مطارات العراق افضل من مطارات ماليزيا , لانه خبير مطارات وقطارات وانفاق .

ومصدكَين كلشي , اي شي تريد تكَوله والله احنا مصدكَين , بس لتحلف والله مصدكَيك , مصدكَين شهادتك ونعرف انت دكتور ومصدكَين لحيتك والطمغة بكَصتك , ونعرف انت تقي وورع ودمث ابن دمث وتصلي صلاة الفجر بوضوء صلاة المغرب , وانك تتلو القران اناء الليل واطراف النهار وان جدك موسى الكاظم وانك زاهد في الدنيا متوجه بقلب سليم الى الاخرة ..

احنا مصدكَين ,, مصدكَين بكل شي , لو ما مصدكين ما انتخبناكم , شنو احنا مجانين ننتخب كذابين , حشاكم من الكذب , لا عيني والله مصدكين , والشعب من يكول : كذاب نوري المالكي كذاب , اصلا الشعب هو اكبر كذاب , ليش هو منو انتخب نوري المالكي , منو انتخب خالد العطية , منو انتخب حسن السنيد , منو انتخب علي الدباغ , منو انتخب اياد علاوي منو انتخب الملايات البحرينيات , مو الشعب نفسه , الشعب هو ابو المشاكل ,, منو دمرنا غير الشعب , شعب يصدًك كلشي .

حتى اذا اجاهم واحد ياباني وكَلهم اني موسوي يكَولوله دخيل جدك ابو الجوادين , اللهم صل على محمد وال محمد , والله عرفناك مولانا , ماشا الله حتى اللاب توب مالك اسود .

واذا اجاهم واحد بلجيكي ابن بلجيكي وكلهم اني من اهل العمارة ,رأسا يصدكَون , اي نعرفك , بيتكم بالمجر يم الفرن, انت مو رجل زهرة بت عليوي وخالتك بدرية , تفضل استريح ابو مطشر .

القاهرني هو العراقيين يصدكَون كل الناس , بس شلش العراقي , شيحجي يكَولون جذاب ,

اكلهم فلوسكم راحت , يكتبولي اسكت جذاب ,

يابه تره يضحكون عليكم , انجب جذاب ,

اخوان تره ابراهيم الجعفري نصاب , واحد كتبلي : صه يا رقيع , شسوي صهيت وامري لله ,

اختي ام اركان ترى رجلج متزوج عليج , تضحك ام اركان وتكول ابو اركان ميبدلني بجوليا روبرتس , وبينما هو بشرفي متزوج رضية ام الحسابات ,

يمعود قاسم قشمروك الجواز يطلع بورقتين , ليش دفعت ست اوراق , شلش انت تغار لان جوازك ليهساع ما طلع ,

يابه بيت ابو حمزة تره ابو منتظر نسيبكم مو سيًد , الرجّال كناني اني اعرف اهله واخو عدنا بالشركة , اسكت عمي متشوف نور محمد بوجهة ,

خالة ام جمعة ابنج بالمجاميع الخاصة ويحط لاصقات بسيارات الناس , تكللي تروح لا افلش راسك بالهاون , ابني اربع وعشرين ساعة كاعد على الفيس بوك ميطلع لباب الحوش ,

وهكذا يستمر ابناء الشعب العراقي في تكذيبي , كلهم يكذبوني , بس صديقي عبد الرضا المسكين , شحجي يصدكَني ,

وقبل كم يوم خطية سألني : شو ماكو شلش محد يسمع حسك , ظل بالي عليك ؟

كتله يا اخي ابتليت بلوة , هاي مريام فارس المطربة , بعد حفلة نادي الصيد اجتني للبيت ومتقبل تطلع واني خايف اهلها يحسًون وتصير مشكلة

صفن عبد الرضا ودار راسه شوية وبعدين جاوبني بسرعة : ليش متفلت بيها للسليمانية وهناك تتزوجها على سنة الله ورسوله ...

شتكَولون اسويها واضرب خديجة بوري , لو متسوه.

شلش العراقي



الجيران