قصيدة دين ابوهم اسمه ايه - جمال بخيت

[ماهر سعيد متي]

قصيدة دين ابوهم اسمه ايه - جمال بخيت

دين أبونا يا مسلمين
في يقيني
أعز دين
كلمة النور الأمين
كلمة الحق المهين
حكمه يكتبها الاله
فوق جبين الطيبين
دين أبونا يا محمد
أنت سره ومبتداه
أنت إحساسه ومداه
دقه عارفينها في قلوبنا لما نخشع للاله
لما نطلب يوم رضاه
لما نركع
لما نسجد
لما نفرح للحياه

دين أبونا إبراهيم
رش جمر النار حنين
عالخرايط والأماكن
اتولدنا ... طوافين ... زاكرين
دين أبويا لو مسيحي
رحمه لجل العالمين
نصره لجل المظلومين
كلمة الحب اللي بايس
الصليب جوه الكنايس
ندهة الأجراس لمريم
والأمان للمجدليه
رحمه ليكوا
ورحمه ليا

المسيح شايل آلامنا
لجل يهدينا السلام
خد أيمن
خد أيسر
العباده مهش كلام

عيش باسم الإنسانيه
تدفعك للانتقام
دين أبويا دين الهي
أينما كان اتجاهي
حتي لو كان دين يهودي

إحنا مش ضد اليهود
موسي في القرآن وليد
يحضنه نيل الخلود
بين ايديه 9 عصاته حيه
وجدودنا شهود
سحره آمنوا برب موسي
انقسم له بحر عاتي
والجبل عرف السجود
رجعت الحيه عصايه
حضنت التوراه وصايا

اوعي تقتل
اوعي تسرق
اوعي تزني
اوعي تقبل بالخضوع

بحر خير الكون يواتي
لما نفرد له القلوع
والجحيم ياكل سنينكم
لو فقير فيكم يجوع

الوصايا هي هي
ارتضيها زي ماهي
في ضميري وفوق شفاهي
دين أبويا دين الهي
أينما كان اتجاهي
حتي لو كان مش الهي

المجوثي يترعد من النر ويعبد الاله اللي في خياله
ليه حرامه ... وليه حرامه
تسمعه في معبد دعاه
تلهمه رعشة رجاء

للبقر ناس يعبدوه
ويدينوله بالولاء
مش غباء
تعرفوا في البقره إيه بيقدسوه ؟؟
العطاء

دين أبويا أي دين
فيه عصاه أو مخطئين
بس في نهاية المطاف
فيه ملايكه ومؤمنين
والرضا للصالحين
والهنا للصابرين
فيه ملاذ للعابدين
الشاكرين
المشتاقين رغم الضياع ... لليقين

دين أبويا أي دين
اللي أنا بقي معرفوش
الوحوش ... الكروش
اللي لو طالوا رقابينا
بينهشوا مبيرحموش
دين أبوهم اسمه إيه ؟؟

اللي داسوا فوق رؤوسنا بالبياده
اللي مشيوا بالبلاد للبلاده
اللي فتاويهم فساد للعقل يقضي علي العباده
اللي مسحوا من الآيات معني الشهاده
دين أبوهم اسمه إيه ؟؟

لوثوا الدم في عروقنا
سدوا عين الشمس فوقنا
سرقوا ضوئنا
صادروا نيلنا
ودفعونا تمن وضوئنا
دين أبوهم اسمه إيه ؟؟

اللي باعوا وطن بحاله
خضرته وصفرة رماله
نسوته وشهوة رجاله
بهجته ودمه وعياله
خطوته وسنين نضاله
ثورته ضد احتلاله
دين أبوهم اسمه إيه ؟؟

مين الهه
مين رسوله
فين كتابه
فيه ملايكه
ولا غابوا
فيه شياطين
ولا تابوا
لما شافوا التابعين
شرهم زاد عن جهنم شر لا يمكن حسابه
دي أبوهم اسمه إيه ؟؟

حتي فرعون اللي صدق إنه من نسل الاله
واللي قال إنه الاله
كان بيبني الأهرامات
للممات قبل الحياه
كان له بعث ويوم حساب
كان له دوله
حضور
إداره
كان مناره ترشد الكون للحضاره
كان له جيش فارض وجوده
كان محارب بين جنوده
وأما يتجاوز حدوده
كان له رب يغرقه وينقذ يهوده

حتي فرعون اللي صدق إنه من نسل الاله
واللي قال إنه الاله
كان له كهنه في العلوم
يقروا في كتاب الكواكب
يرصدوا سير النجوم
يفتحوله سكك
بيبان
في سراديب الزمان
ويقولوله إزاي يدوم
حنطوه
خلدوه
بالمعاني والمباني والرسوم
كانوا كهنه مؤمنين
خلوا كلمة مصر .. دين
حاضره في العهد القديم
حاضره في العهد الجديد
حاضره في القرآن حضور
الآيات فيها تدور
مفردة عز وجلال
معلنه وبين السطور
تخترع ثانيه وشهور
تخترع شعر وبحور
حتي فلاحنا الفصيح
شكوته ... بتشع نور

إيه يا مصر
إيه يا أرض الطيبين
اللي حكموا في الزمان ده يبقوا مين ؟؟
دين أبوهم اسمه إيه ؟؟

حتي يعرف فيكوا دين
كل أتباعه لصوص ... أو قواضين
في المعاصي ... موجودين
في الكراسي ... مأبدين
في التفاهه ... معدودين
في السفاهه ... مفرودين
علي البلاهه ... مسنودين
للشراهه ... مجندين
علي القرف ... متعودين
علي الشرف ... متمردين
علي الوطن ... متنمردين
بالخيانه ... موحدين

اللي يعرف دين كده يقولي عليه
دين أبوهم اسمه ايه ؟؟؟