الصلاة المقبولة والغير مقبولة

[farajsaka]

تحية طيبة للكل --- اليوم اريد احجي وياكم عن الصلاة المقبولة والصلاة الغير مقبولة - كثير منكم يمكن يكول بقلبة انه اني اصلي بس الله ما يستجيب طبعا ما يستجيب لان اصلا صلاتنا يمكن ما توصل الى الله اول شرط من شروط الصلاة المقبولة والمستجابة هو الوضع اللي انت بيه دا تصلي هواية اكو يكعدون ويصلون واكو ناس تتمدد بفراشها وتصلي يا اخوان هذا النوع من الصلاة غير مقبول وغير مسموع ودا تعبون روحكم بلاش ( لاتصلون هيجي اريح الكم لان ما راح تحصلون شي ) ثلاث اوضاع للصلاة المقبولة اكو اولا الوقوف ثانيا الركوع على الركبتين ثالثا الركوع كاملا الى ان تمس الجبهة الارض غير وضع ما مقبول الا للضرورة القصوى يعني انسان مريض او مقعد او في وضع خاص ما يتمكن بيه من الوقوف .الصلاة كما هو معروف للجميع هي كلام مع الله زين يصير تحجي مع الله وانت كاعد يعني اذا انت موظف بدائرة معينة ودخل المدير على الغرفة مو راح تقف وتحجي وياه كم بالاحرى عندما تتكلم مع الله اكو شي اخر  اذا تريدون يستجيب الله لصلاتكم  هنا لازم تطبقون الشرط الثاني من شروط الصلاة وهو الصلاة بايمان حقيقي وبقلب نقي (ودموع اذا امكن ) وبمحبة لامتناهية لجميع البشر (العدو قبل الصديق ) كلكم تعرفون انه اكو ايمان حقيقي بالمسيح وايمان غير حقيقي اللي يودي الى بحيرة النار والكبريت ( اللي تعرفوها كلكم المكتوبة بسفر الرؤيا المعدة لابليس وجماعته ) فالقصد من كلامي شنو يا احبائي انه ليش تعبون نفسكم وتصلون صلاة اصلا ما توصل الى يسوع لو صلوا صلاة مقبولة لو ماكو داعي . تحياتي الكم كلكم -- غير مرة راح احجيلكم عن الايمان الحقيقي وشلون تعرفون عدكم ايمان حقيقي لو لا ( يعني تعرفون من هسة وين راح تكون ارواحكم بالفردوس لو لا )

[walaa]

شكرا الك كلام حلو وبانتظار الجزء الثاني حول الايمان الحقيقي

[farajsaka]

شكرا الج اختي ولاء ونطلب من الرب ان يستخدمج لتمجيد اسمه اكثر واكثر والرب يحميكم

[الاكليريكي بشار الشمني]

تحية طيبة اخ فرج
   شلاما دمارن

من بعد ما قريت موضوعك ، ويمكن متأخر قريته انا شوية، قررت ارد عالموضوع بنفس اللغة اللي انت كتبت بيها يعني بالعامية.
بداية طبعا شكرا كثير على موضوعك وعلى شعورك اللي يدل على حبك للتعليم. ولكن متكولي منين جايبها هاي المعلومات؟؟ شنو قصة الوضعية اثناء الصلاة؟؟ ترى ربنا ما يباوع الك انت شلون كاعد وقت اللي دتصلي((واكف والا نايم والا كاعد)) ، ترى ربنا يباوع لكلبك، ربنا يباوع للفكر وللنيات. اما بالنسبة للوضعية الي يتخذها المصلي، فراح اكولك فد شي: ترى هاي القياسات والاشكال اللي كتبتها بالموضوع مالتك هي قياسات ارضية وبشرية بحتة، يعني شمدريك انت ربنا ميقبل صلاة المتمدد؟؟ طيب اكو تعليم كتابي يوضح كلامك؟؟ زين انطيك مثل من الكتاب المقدس، عدما التلاميذ راحوا سالوا ربنا اش تعلمنا نصلي: ما كاللهم صلوا وانتوا راكعين ولا صلوا وانتو واكفين، هاي الوضعيات هي وضعيات خاصة اوجدتها الكنيسة للنظام واكرر هي خاصة بالكنيسة، يعني واحد بغرفته يريد يصلي ... لازم يصلي وهو واكف؟؟ لو راكع؟؟ والا ربنا ما يسمع ولا يقبل صلواته؟؟ ترى هذا الكلام مو صحيح.
وانا اكولك عن خبرتي الروحية، انا يومية اصلي وانا متمدد بفراشي وعن خبرة اكولك مو تباهي، عندي شعور انه ربنا يكون يسمعني ومتاكد لان ديستجيبني. وبعدين اكلك شغلة ثانية، انت تكول المريض ممكن انه يصلي وهو نائم ... طيب هاي منين جبتها؟؟ ترى احنا معدنا فتاوي هااا .. طيب المريض الروحي؟؟ والمتألم والمكتئب ... يعني هذولا نكوللهم لا تصلون ترى ربنا ميقبل صلاتكم؟ وشوف ادلة كتابية اكو هواي على كلامي مثل مقعد بيت حسدا مثلا، اي هذا شلون سمعله ربنا واجا هو بنفسه لي يمه حتى يشفيه بالرغم من انه كان مقعد يعني صلاته طول عمره كانت وهو متمدد. ثم لص اليمين شلون كانت وضعيته وقت صلى؟؟ ثم يونان من كان بجوف الحوت شلون كان من صلى؟؟
يا حبيبي لا تعقدون الامور .. المسيحية هي حياة، يريدنا المسيح نعيشها ببساطة، وابدا مو ضروري يكون كل البشر علماء بالكتاب المقدس حتى يخلصوا. ممكن صلاة بسيطة يكررها المؤمن مع بساطة في الحياة تؤدي بهذا الانسان الى الخلاص.

[farajsaka]

شكر جزيلا على اهتمامكم بالموضوع والرب يقوي ايمانكم ويستخدمكم لخدمته اكثر واكثر سلام الرب ونعمته تكون معكم اللى الابد